最具氣氛的中秋節

中秋節的節日氣氛僅次於農曆新年，因為它有月餅商聯手安排的超長提示前奏，與商機成正比。清明重陽都未算委屈，大過年的做冬連假都益唔到大家放，往往仲要比人怨為此被夾去食交際飯…做呢行係咪都無假放，所以我對節日早就冷感。中秋節的回憶是當月餅是生日蛋糕切一餐，同埋20歲仔仲走去拖住成隻狗咁大的竹枝拗成的楊桃燈籠夜闖山頂，沿途發自小朋友那些既羨又妒的銳利目光，仿似我們幾隻牛龜跟小朋友爭玩具玩。

今年三喜臨門、一門三傑，ER個醫生決定要我係醫院過中秋，本來7點半完結的探病時間，護士大發慈悲extended到2130先下逐客令，藥力發作一訓訓到中秋子時，可能護士怕我悶，特登安排左我訓一間臨時既單人房，對正護士counter，所以佢地圍埋邊食宵夜做節邊興高采烈地呻正日工作有多苦的嬉笑怒罵聲變成我的中秋報時器，眼見交頭接耳聲隨外面的光線漏到漆黑的房間時，給我一種25年從未有過如此深刻的中秋節氣氛。幸好beta有先見之明預早留低一個錦囊，一打開原來係個手工9流的燈膽仕樣小白兔燈籠，正好「越位」抵消護士以熄燈強制人訓覺的手段，今個中秋我看不到9年來最近地球的月球，但卻是有生以來和中秋節走得最近。

p.s. 當日和事後照顧小弟的姑娘阿姐醫生們邊都對兔仔燈籠愛不釋手，玩到無電時有人特登換電以求一睹發光的白兔，原來內裡那份美麗的心思，大家都看到的，之所以alone but not lonely，多得它和他。

《this is how it goes》 aimee mann