我投降

唔知你覺得今日個沙律點呢？多左蝦係咪好食的？我覺得的蝦粉粉地，的青蘋果唔夠爽。係啦，你都唔buy青蘋果既，見你係咁落沙律醬，即係覺得一般。

咁究竟你覺得綠茶雪糕同個朱古力火鍋夾的，抑或係你根本鍾意食綠茶味雪糕先？的雪糕我買既，就梗係全部都鍾意食啦，尤其唔係成日有得食ben & jerry，佢隻cinnamon bun好正，而mint chocolate crunch入面有我去多倫多搵大嫂大佬既回憶。你乃保守派系中先入為主主義擁護者，睇你都唔會再恨去食ben & jerry啦。

今晚悶死你未呀？無講多過20個字呀。我知係我衰，你轉更都要你山長水遠一出一入咁搭2個鐘車，食餐一塌糊塗既私房菜，成檯人最熟怕且係luc仔陰公。但我想話你知，今晚同檯食飯既人，對我來講係生命中最重要的其中一班人，入面當然要有你啦。趁我去北京之前有時間，希望一次過見到我最想見既人，為你地準備能力範圍內的食物，好casual咁食下飯傾下計，快快樂樂咁過一晚。好多謝你無半句怨言咁黎左成全我，但無法令你融入其中去分享我的快樂，sorry。將我快樂建築係你痛苦之上。

往往我滿心期待能為你帶來快樂的活動，結果都無好結果，好似我既價值觀應用唔到你身上。好少男朋友會抗拒接觸我媽咪同融入我的圈子，更無幾人係我出盡法寶都逗唔到佢笑，好有挑戰性。我就黎要出動風火氣豬猴...定抑或凡事講清講楚，慳返假驚喜呢的花招仔呢？咁我整左成日係咪無謂既呢？我的心思備受嚴峻的考驗。

你話呢次拍拖同之前拍拖所做既事好唔同，其實係個投訴黎嫁？我後知後覺，對唔住。

可能對你黎講，今日的sweetest moment係陪你等車啦。